Tuni September ni 27, kum 2021 zing suimilam 10:00AM in 11:00AM tiang Chin ramkulh chungah Chinland Defense Force (Thantlang) le Min Aung Hlaing ralhraang pawl cu khuami chung hmun pakhat ah i kap in CDF-Thantlang lei nih ralhraang pa 5 hna tlawm lo an thah hna.
Ralhraang pa 5 nak tlawm lo an thah hna hlei ah hliamhma pumi zong tampi an um lai tiah an ruah, Chinland Defense Force (Thantlang) lei tu cun hliamhma pumi pakhat hmanh an um lo, khuapi chung i mipi hna neihmi Inn le Dawr thilri pawl nan fir kan in hmuh hna ah cun thilak kan in kah hna lai tiah ralrin peknak le thawngthanhnak an tuah chap.
Min Aung Hlaing kut tang ah rianttuanmi ralkap le palik hna nih mipi lei ah kan ttang ve ko lai timi lungput nan neih ah cun CDF-Thantlang lei nih lunglawm tein kan in don hna hi nan himnak hmun ah kan in thlah hna lai tiah theihternak kan in tuah chap hna tiah thawngthanhnak an tuahmi ah cun an langhter chap.
Mah kong kan ttialmi hi Chinland Defense Force lei nih official tein an thlah cang ko caah kan vun lehmi si timi kha carel tu mipi hna sin ah theihternak tuah kan duh ve.
