Rambuai chung ah a um cuahmah mi kan si caah CDF-Thantlang le CNA/F lei nih mipi sin thawng thanhnak an tuah tik ah mipi lei nih zulh khawh kha kan rian biapi taktak mi a si.
Ralhrang lak in mipi kan luat khawh nak ding caah thawng thanhnak an tuah mi paoh cu zulh khawh zungzal i zuam cio hna u sih.
CDF-Thantlang nih Chin mipi sin ah a biapi tukmi thawng thanhnak an rak tuah tthan mi cu, Hakha in Thantlang karlak mipi nih zinglei suimilam 7 le cheu hlan ah le zanlei suimilam 5 le cheu hnu ah khualtlawng hrimhrim ti lo ding a si lai.
Chun ahcun zalong tein tlawn khawh a si ko lai. Ralhmun ah kan um cang caah mipi him nakding caah CDF nih zulhding kan chuah mi hi mipi nih nan kan zulh piak naklai kan in Nawl hna. CDF-Thantlang nih mipi hna ralhrang lak in kan him khawh nak ding caah thawng an kan thanh mi hi kan dihlak zulh khawh i zuam cio hna u sih.
Relchap- A poi tuk Ai Ee. Kan Miphun Ralkap Kut Ah Saya Vabielo A Thi
Pyine vawleicazin zung(Hakha) ah duh-usi a tuanmi Saya Vabielo(Sabawngpi khuami, Mara) cu CDM tuah ding ah September 27, 2021 ah amah lawng in khua ah a tlung. Nain, lampi ah CDF-Thangtlang nih an tlaih i nithum hnu September 30 ah a thi cang tiah a chungkhar nih thawng an theih.
Bia kan halnak ah a tlu i a thi’ tiah CDF-Thantlang nih an kan ti tiah chungkhar lei nih an chim. A ruak hi CDF-Thantlang nih Zophei-CDF bawmh an hal hna i Zophei-CDF nih Rezua tiang an va thlah, Rezua ah Mara-CDF nih an rak lak ti a si.
Saya Vabielo cu kum 45 a si, fa 5 a ngei i anupi le a fale cu an khua ah an um. Matupi ah caan saupi cozah rian a tuan i Hakha ah an thialnak hi kum khat hrawng lawng a si rih. Dam lonak pipa a ngeimi cu a si lo tiah a chungkhat nih an chim.
A ruak an zoh tikah a lu a kuainak zong a um. Cu a hma cu a tluknak in maw a si asilole a dangdang in dah a si timi cu chungkhar lei in an thei kho lo. CDM a tuah lo tiah an ruah caah maw an tlaih asilole dalan bantuk ah an ruah caah dah an tlaih timi cu CDF-Thantlang lei nih fianternak an tuahmi a um rih lo. By Salai Lungthlitum
