Chin Defense Force-Midat le Yaw Defense Force – YDF mipi vengtu phu hnih cu hmunkhatte ah ṭangṭi in hmunkhat ah SAC ralhrang cu a lamkip in dohṭi dingin hnatlaknak an ngeih cang tiah Chin World sinin thawng theih a si.
Nihin July ni 28, ah Chin Defense Force – Mindat le Yaw Defense Force -YDF mipi ralkap phu hnih hna nih cun an official facebook page cahmai ah kaphnih hnatlaknak cathanh an tuahmi cu zapi hmuh khawh dingin an thlah cang.
Hi ca an thlahmi hi a luancia July ni 26 ah hmunkhatte ah ṭanṭi le SAC ralhrang dohṭi ding timi hnatlaknak cathanh cu an rak ṭialmi a si i, nihin July ni 28 ah zapi hmuh awk le theih dingah an official page ah an hun langhter i an tar hi a si.
An cathanh chuahmi ahcun kum 1962 thawk in Ralkap Uknak cu a hung chuah tikah ramchung kokek thil chuakmi (natural resource) hna le a ram minung (human resource) vialte cu an hrawhhral dih i, rammipi thisa an dawpnak caan hi kum 59 a ti ko cang, nain nihin chun tiang a hmun ko rih, a hram taktak hrawh a si lo timi an telh.
Cu pinah, mah cu ti, thidor a tla, le zut cuahmahmi kan rampi sicanning remh le sersiam ṭhannak ding caah Myanmar rammi vialte vawleicung ah zalong tein kan dir khawh nakding kha papek le i hmaithlak in kannih YDF le CDF Mindat phu hna cu SAC ralhrang a hramthlongh i a cihmih dih ding timi sehchih in le zumhnak ngeih in, khat le khat i dirkamh le cawlcang ṭi dingin hmunkhat ah u ting nau zo tein kan dirṭi cang lai ti tehna kha an cathanh ah an telh chihmi a fiannak bik cu a si.
