Mipi lei nih caan kar lak hruaitu caah thimmi National Unity Government nih a rauh hlaan ah USD 800 Millions bak budget don ding kan nei, mah hi PDF ralkap hna meithal bawmhnak ca zong ah kan hman lai tiah NUG cozah lei in vuanci Doctor Toe Khaung nih social media cung ah a thlah.
Tu lio dirhmun ah NUG lei ah bawmhnak a rak lutmi USD 17 millions cu PDF hna meithal cawknak, training an kainak le CDM pawl bawmhnak ah kan rak hman, mah ti kan hmanak vialte zong cazin in ttha tein kan neih, kan tuah dih, USD 17 million hi a tam ngaimi lo nain NUG cozah pi nih vun hman tak tak ah cun Vui pi hmur ah Chi theh bantuk lawng si.
A si nain NUG nih kan herhmi Budget USD 800 Millions cu a rauh hlaan ah kan hmuh cang lai, PDF hna caah meithal zei maw zat kan bawmh cang hna bantuk in kan bawmh thluahmah rih hna lai, ram pumpi huap in PDF caah meithal kan zalh thluahmah lai.
Bawmhnak kan rak hmuhmi USD 17 millions nih khan PDF caah meithal zun 5000 lawng a cawk khawh nain tu ah cun mah nak tam in kan cawk khawh lai tiah Doctor Toe Khaung nih social media cungah a thlahmi cu si.
