Mandalay khuapi Kah-ngiah-nah zung ah tuni cotober 27 zinglei suimilam 11:00am ah khan bomb a puak i bike zeimaw zah an kang tiah theih a si.
Bomb a vun puak le cangka khin bike pawl cu an kang thluahmah tiah theih a si. Hi bomb puak mi ai thawk nak hmun cu pawngkam mithmutu nih an chim nak ah cun bike an chiahnak hmun in ai thawk mi asi tiah an chim.
Hi bomb puak mi ruangah hin pa 1 le nu nghakchia minung 3 fak ngai in hliam an tuar i siizung ah an tlikpi colh tiah theih a si. Hi bomb mi cu mizei tuahmi dah a si tihmi cu tu tiang theih a si rih lo.
Cheu khat zumhnak ah cun PDF lei nih an tuahmi a si ko lai tiah an chim ve. Nai hrawng cu kawlram hmun kip ah kahdohnak thawngpang le puakkeh nak thawngpang lawng tein a khat cang. Min Aung Hlaing ca hrim ahcun thawngpang ttha theih awk a um kho ti lo.
Relchap- Thailand Ram Chung Ah Phung Ninglo In A Lut Myanmar Mi 260 Tlaih An Si. Kan kawlram cu Min Aung Hlaing uico pa nih fabuary ni 1 ah nawl ngeihnak a lak i, mah ni thawk in kan kawlram pi cu biatak tein buaibai hram ai thawk. CDM a tuahtu mipi nih ralhrang uknak cu duhlo in heh tiah sahdahpiah hram an thawk colh.
Mah ruang ah ralhrang nih meithal tiang in mipi sandahpiah tu pawl cu hro daihter an timh ko nain daihter cu chimlo mipi thinhan nak cu nikhat hnu nikhat a hung linsa chin lengmang.
Ralhrang nih sandahpiah tu minung tampi an tlaih leng ah minung zeimawzah cu meithal in an kah hna ruang ah an nunnak a liam. Mah ruang ah kawlram mipi an si ah, Tlangcung mi an si ah an thinhan nak a hung linsa chin lengmang caah khua kip ah mipi ralkak an hung dirh thluahmah.
Cu lawng hmanh silo in NUG cozah tiang nih PDF ralkap an dirh i cu hna nihcun heh tiah ralhrang cu doh an si. NUG cozah nih kan kawlram pi cu D-Day an vun thanh bak in kawlram hmun kip ah kahdohnak thawngpang a khat dih colh.
Mah ruang ahcun Chin mi tampi cu Mizoram ah kan zam i kan Kachin kan unau hna le kawl miphun cheukhat hna cu kaadang ah zamnak an neih lo caah Thailand ram ah thli thup in zam i luh an ni tim. Thailand ram cu palek nih biatak tein security an vun ciat caah thli thup in luh ai timi minung tampi tu le tu in an tlaih hna.
Nizan October 25 ah kawlram in ralhrang hna ttih ruang ah minung tampi Thailand ram chung ah luh an i timh lio ah Thailand palek nih phung ning lo in an ram chung ah luh ai tim mi kawl ram mi minung 260 bak an tlaih hna.
Note: Zumtu unau le nau hna kan umnak khua le ram cio in kan kawlram chung ah ralhrang hna a doh cuahmah mi kan mipi ralkap hna caah le ralhrang ruang ah Mizoram, Thailand ram ah a zam i tlaihkhih a tawngmi hna caah thacam bawm cio u sih. Kan chuahkeh nak kan ram teah zalong tein an kir tthan khawh cio nak lai, daithlang lo tein thlacam bawm peng u sih.
