SAC ralhrang phu hna nih August 25 ni, Thantlang sianginn sang chung ah an kah i a tlolh mi bomb cu August 27 ah a puak than i Pu Hlei Bik (kum-40)cu a nunnak a liam, cun hliamhma pu mi zong an um len tiah thawng kan theih.
Sagaing ramthen Myaung peng chung khuachungah cawlcanghnak a tuah lengmang mi ralhrang cheukhat hna cu covid-19 zawtnak an ngei i, minung 2 an thi cang tiah Myaung PDF nih an chim.
Mah ralhrang hna hi August 21 hrawngin Sagaing le Magwe remthen khuachungah an lut i, khuami a tlai lengmang mi hna an si. Bu 2 in an i then i, minung 60 lak ah minung 50 nih zawtnak an ngei.
An zawtnak hi a sau pah cang. Eidin zong mipi nih an pe hna lo, sii zong tha thiin an ngei lo. Pahnih an thi cang, pakhat cu a dirhmun a tha lo ngai, oxygen pek a hau mi a si tiin kan theih tiah Myaung PDF nih an chim.
Erawady tiva hrawng Myaung peng nichuaklei Bokawng, Thungkyaing, Memataw, Nagapauk khua le Nitlaklei Chindwin tiva thluan ah a um mi khua 8 hna cu ralhrangbu nih an luthnawh lengmang hna ruangah khuami 1000 leng an zaam cang tiah theih a si.
Hi kong he pehtlaihin khuami pakhat nih; an zawt ruangah khuachungah bawmhnak an kan hal, siibawi zong an kawl. Khuachung Ar hna an thah, an ei. Covid an si ti a fiang. An hawile ka dangah a ummi hna zong nih an rak fonh duh hna lo tiah a chim.
Ralhrangbu hna cu Myaung pengchung lawng si loin Sagaing ramthen Dipeyin, Minkin, Yinmapin, Kani le Magwe ramthen chung Yesakyo peng chung khua hna cu khuakhat hnu khuakhat an luhhnawh i, khuami an tlaih, an thilri an chuh lengmang hna tiah theih a si. Crd: TCP
