Sagaing ramtthen, Minkin peng, Kalaywa-Monywa kar motor lam chung, Gone Ngen timi khua pawngah nizan September ni 25, kum 2021 ah khan Min Aung Hlaing khuachia ralhraang pawl le Taung Dwin PDF ralkap hna kar ah kah dohnak chuak in khuami pa 12 le PDF ralkap lei in pa 3, an dihlak ah minung 13 bak an thi tiah ngaihchiatnak thawngpaang theih a si.
Nizan ah a chuakmi ralhraang le Taung Dwin PDF kar kah dohnak hi suimilam pahnih chung hrawng a rau i ralhraang lei nih bomb kahnak rumro an hman ruangah tu bantuk in khuami le PDF ralkap lei in minung 15 an thihnak si. Mipi lei in minung 15 an thih bantuk in ralhraang lei zong in pa 5 an thi ve.
Hi kong he pehtlai Taungdwin PDF nih “ralhraang pawl hi kan mah nih kan kah hnami si, ralhraang lei nih bomb kahnak rumro an hman ruangah kan mah lei tu nih hnu lei ah kan sip taak hna, tuzing deika khan ramhlak ah kan kawl hna cu minung 15 thimi ruak kan hmuh hna i tuni ah kan vui colh hna”
“A thimi hna lak ah hin kan mah PDF ralkap pa 3 an i tel, a dang tu cu khuami sawsawh an si i an dihlak in pa lawng te an si ko, cheukhat cu an lo chung rian an ttuan lio ah meithal le bomb puah thawng thei in ramhlak an zaamnak ah bomb nih a khen hnanak in a thimi an si, chim ka duhmi cu NUG lei nih a rannak in hriamnaam kan zalh piak hraam uh” tiah a chim.
Taungdwin People Defense Force hi Minkin peng chung khuate 30 leng fonh in dirhmi phu si, nizan kahdohnak ruangah khuami 1500 hrawng khua chungah um ngam ti loin ramhlak ah an zaam hna.
