Tuni September ni 25, kum 2021 chung suimilam 12:00PM hrawng ah khan Sagaing ramtthen, Kalay peng chungah private motor hmang in aa chokletmi Min Aung Hlaing ralhraang pawl an cuannak motor cu People Defense Force Kalay nih mine bomb in an tthuat hna i ralhraang pa 8 bak an thah hna tiah thawngpaang theih a si.
Min Aung Hlaing ralhraang pawl nih hin mipi motorcycle pa 5 le thil phurhnak motor pa 4 hmang in thlanglei kap zawn in Kalaymyo lei an vun ratnak, Chin Sai timi khua pawng, Tlaanglawng lam cho zawn lawnh ah PDF (Kalay) nih mine bomb in an phomh hna.
PDF Kalay nih mine bomb in an puah hnanak ah ralhraang pawl cuannak motorcycle pa 3 le motor pakhat rawk in a cung cuangmi ralhraang pa 8 bak an thah khawh hna.
Mine bomb an puah hna hnu in ralhraang pawl nih an ttih tuk lung in Chin Sai khua lei hoih in meithal an puah thluahmah, cun mine bomb puahnak in a rawkmi motorcycle le motor kaltaak in le a thimi ralhraang pawl ruak cu motor dang cuang ah chuang in Kalaymmyo khua chung lei panh in an kal, PDF (Kalay) lei in a thimi le hliamhma pumi an um timi thawngpaang tu cu a um lo.