Careltu nan zapi upatnak kan pek hna. A tu kan van langhter dingmi cu sam rangmi a nah tthannak ding le sam a tlawmmi nih sam chahmi nan ngeih khawhnak hnga Mangkalong thei hna hmang in sam thlopbul ningcang kan van langhter lai.
Sam hi minung pakhat I a pahnihnak hmai (face) a si caah sam hi a biapi tukmi a si I thlopbul a hau takmi a si fawn. Pipu hna nih an chim tawn lengmangmi ah cun “Nu hna an I dawhnak cu an samtom ah a si” timi pupa bia ah chim a sit awn. Nu hna caah sam hi a biapi tukmi a si.
Zei ruang ah dah sam hi a hleikhun in nu hna caah a biapit tuk ti ah cun, a sam a saumi nu cu nu le nu hmanh mitt hit a si bangin pa zong nih a sam a thami le a sam aa dawhmi cu an uar deuh ko. Nu lawng siloin pa zong sam tam sam chah hi a biapi ngaimi a si.
Pa pakhat hi a sam a tlawm tuk I a cal a ngau ah cun zoh a dawh lo I an mah te zong in dar thlalang an I zoh ah an tha a tho lo. Kum upat ttung loin sam a tlawm tuk I cal ngoh ah cun zoh hrim aa dawhcah lo I thil kalphung a si lo ti phun in ruah le hmuh a si.
Cu caah nu he, pa he pahnih ning in hman a fawi I kokek thil in mah te nih tuahmi a si lai caah ngandamnak ca zong ah bawmchantu a si lai tiin a tu sam sii tuah ning hi kan van langhternak a si. Mangkalong thei hna in sam rang nahternak, sam tlawmmi tam ternak le sam tlongmi tlongh lonak cu a tanglei hin na ser lai I na sam ah naa thuh lai.
Apakhatnak ah Mangkalong hnah (Guava Leaves) cu na duh zat in na ttawh lai. Tahchunhnak ah hnah (15) hrawng. Cehrep in na riam lai. Mangkalong hnah cu a hang chuak ding in na tuah lai. Tahchunhnak ah, theihai riualnak she, sum ti bantukin na phomh, na rial lai.
Hmanthlak ah a langmi bangin Mangkalong hnah cu a hang chuak lak in na rial na phomh dih hnu ah a hang zor khawhnak hnga puanchia panmi silo zaka pakhatkhat in na dip lai. Cu a chuakmi hang cu na sam ah na thuh lai.
Suimilaam (1) tluk na ciah hnu ah na sam cu na ttawl lai. Cu tiin zarhkhat ah voi thum na tuah a si ah cun na sam a rang mi kha an nak lai I, sam caah vitamin a si lai. Na sam a nak lai, a sau lai. Cu caah zarhkhat ah voi thum na thuh a hau lai.
Cu tiin naa thuhmi ruang ah na sam zong an tam lai I mi zapi nih kherh tthan in zoh cu na hlawh lai. Pa pawl sam tha sam tammi zong phundang tein an I dawh ve ko. Cu caah a tu kan van langhtermi Sam thlop ning cang hin tuah ve hrimhrim tiah forhfial kan duh hna.
