Pu Thawng Za Tling ,Thantlang peng,Zephai fapa kum 12 renglo mi cu tuzing ah khan an inn hlannak inn cung dot thum in a tla i,Mata, sizung/ Zato ah an kalpi ko nain a hliam a fahtuk caah chanh khawh lo in a tu zanlei 24 june suimilam 7 pm tluk ah khan a nunnak a liam.A ruak hi ,Mata ah an chiah rih. Tantak mi chungkhar, Bawipa nih hnem ko hnaseh.
Relchap- SAC ralhrang nih Falam Peng khuami Nuam Za Thiang le Ngun Nei Piang an khuallam ah an thah hna
Chin Ramkulh, Falam Peng Zawlnu khua mi Mai Nuam Za Thiang le Salai Ngun Nei Piang hna cu 2021 June 23 zaan suimilaam 9:00 fai ah SAC ralhrang nih an kah hna i an nunnak a liam tiah kan theih.
Hi kong he pehtlai in min langhter duh lo pakhat nih, “Mai Nuam Za Thiang hi khua in Kalay lei ah a kal. Kalay a phak in a hawipa Salai Ngun Nei Piang aa donter i lampi ah SAC ralhrang nih an kah hna.
Pa hi cu a hmun ah a thi. Nu tu hi cu a phei ah an kah i hliam a tuar dih hnu ah an tlaih. A thaizing ah a chungle sin ah nan fanu COVID-19 zawtnak in a thi a ruak rak hlam uh an ti hna,” tiah a chim.
Mai Nuam Za Thiang a ruak zong chungkhar hna nih mithi phur motor an hlan i COVID-19 zawtnak ngei bantuk in a ruak an vui tiah kan theih.
Cun, Salai Ngun Nei Piang he aa naihniam mi pakhat nih, “Nizaan suimilaam 9:00 tluk ah meithal zuun li nga hrawng a puak kan theih. A thaizing ah kan va zoh i a hmun Salai Ngun Nei Piang ruak cu kan hmuh,” tiah a chim. Crd-The Hakha Times
