Zanleisang ah park Badminton tuknak in ka lawi, Facebook ka van kau cu Messinger cakuat a rak lut, “Kawi Dawt, Na dam ttha maw? Kan nih kan dam lio asi. Tuhi Delhi ah na um lio asi ko rih lo maw? Na u Kawi Dawt (Salai Van Dawt Ceu) kha ka asi. US ummi kha ka si. Kan nupa in, Delhi lei na um lio asi ahcun: retheih fial le bawmhhal kan in duh ngai ko e.
Mah cu: kan Chinmi Delhi ummi cungah, a khuasak tintuknak a harsa tuk ko, tiah nangmah nih, na ruahmi chungin, dawng 12 (12 families) in, rak kan thim piak kho hna law, kan duh ngai ko e. Phaisa tlawmpal te cio in bawmh kan duh hna ii. Na caan kar-lak ah thawng na vun ka thanh le tanh piak khawh ahcun, kaa lawm tuk ko hnga. Nangmah kan in bochan ko.
A harsa ko, tiah na ruahmi dawng 12, an vun um ahcun, phaisa zong, nangmah sin ah kan vun i kuat colh ko hnga. Kaa lawm tuk.” Tiah a tial. Kei nih Bawmchantu hmanh nan um ah kan si khawh chung in kan rak hlat lai tiah ka leh. “Aw.. sisi. Mah hi, bawmhnak chimtlaak lo te tuah ka i timhmi cu: organization min in si lo in, nangmah pumpaak min tein, rethei fial kan in duh ko. Cun a dangdang kha, a ho hmanh kan chim hna lo.
Cun Nangmah hrim zong laksawng kuat kan in duh” a ti. Ka thinlung ah a chuakmi cu: aw, harsa cung ah dawtnak le zawnruahnak an ngeimi cu uar a va um ve ka ti. Udawt hi Delhi a um lio zong ah a kom neih tuk kan si lo nain Tangka kong ah zumhnak he bawmhnak an tuahmi tuanvo lakpiak ding rianvan pek cu ti ah ka lunghmuh ziar.
Cuticun ka theih phaktawk pumpak pahnih le chungkhar 10 min ka hei pek. Tangka a van kuatmi thanh pahin mah ti hin ca a tial “Pa Dawt te nupa nih: ei-awk facang tun khat-hnih cawknak ah, an in kuatmi hna si e, tiah rak kan chimh piak te ko ne law” tiah a tial. Phaisa cu kan vun kuat. US $2000 asi ii, India in Rs-147093 asi.
Rs-10000 (thonghra) cio in, cabawm (evelope) te he, rak tthen-phaw cio te ko hna law.Cun, a taangmi Rs.27000 (thongkul le thongsarih) kha cu, nangmah nih rak i laak te. Nangmah ca hrimhrim ah kan vun in kuatmi asi.” Tiah a tial. Cakuat ka zoh cu ka lau. Aaaaa, A tam ko ee. mah cu dah. Keimah hrim bawmh, laksawng pek an ka duh le a si ko hi teh ka ti i lawmhnak in ka khat.
