Kan ram chung ramkheel upa tamdeuh hna hi rawl hak a dolh kho lomi hnukding lio deuh an si tiah keimah catial tu nih ka hmuh ning a si. Kum khua in upa si ruang ah ramkheel lei ah patling nutling a si ti khawh an si lo. Kum khua ano ruang ah ramkheel lei ah patling nu tling dirhmun a tling kho deuh lo tiah ruah ding a si ve lo.
Nihin kan ramchung ramkheel upa tamdeuh hna cu kum khua cun upa an si, khrihfabu ah khrihfabu upa an tuan, Party chung ah ramkheel upa an tuan nain ramkheel muru chung taktak ah an rak pilkho hrim lo. cucu ramkheel lei ah rawl hak a dolh kho rih lomi an si. Ramkheel lei ah cun hnukding lio bak an si ti khawh an si.
Nihin i ramkheel rawl hak dolh kho lomi, ramkheel lei cun ngakchia a si i hnukding lio hna cu an tlaunak hmanh hngalh an si ti lo hi. Ramkheel lopil chung ah kan ton ding mi, kan hrial khawh lo ding mi cu, ramkheel lei ah rawl hak eidin can, ramkheel lei ah a chukcho zawh can, ramkheel ruang ah thliachia totho toncaan, ramkheel ruang ah tihal rawltam ton caan hna hi an si.
cu vialte a tuar kho rih lo i hi vialte harnak a pah chih ngam lomi hna cu kum khua in upa an si zong ah, biaknak le party chung ah lutlai le upa an si zong ah hnukding lio upa an si tiah ka ruah ko hna. Cu bantuk in kan ram dothlennak ah harnak phunphun in na zaam mi hi ramkheel lei ahcun bochan tlak na rak si hrim rih lo, hnukding lio ramkheel mi na si ti kha a fiang mi a si.
Cu bantuk thiamthiam in kumkhua in mino te a si ko nain ramkheel ruang ah harnak hrial loin a pahchih mi mino hna hi ramkheel le miphun caahcun nutling le patling taktak an si. ramkheel lei ah rawl hak a dolh kho cang mi, rinhcanh tlak mino an si. Ramkheel lei ah nutling patling a si mi hna nih le ramdang deuh ah khua an sa, cucu kawl miphun lak zong ah tampi a um.
Miphun dang hna lak zong ah tampi an um. Cu ruang ah pei, Ramkheel lei ah nutling patling a si rih lomi, hnuk ding lio ramkheel hna nih kan ram chung ramkheel lu an tlaih caah ralkap nih oltuk in aa kan vai vuan khawh ve nak a si cu. Cucaah kan ram le kan miphun nih a herh mi upa hna cu, kum khua in upa a si tung i rawl hak a dolh kho rih lo mi ramkheel upa nak in mino a si zong ah ram kheel lei rawl hak a dolh kho mi kan herh deuh. Crd: By: Rolian
