Zahan kha Salai Tluangte tlaihmi HCJ(Hakha Campaign For Justice) page nih Sayama Sung Hlei le Mih Nge cu ralkap thawng petu an si tiah an hmanthlak le an umnak tiang a langhter dih. Cutikah mino tampi an thinhung i ‘thah colh ding’ ‘velh ding’ ‘thawl ding’ timi comment le catial tampi hmuh khawh a si.
Zaan lei ah Sayama Sunghlei a inn cu mino nih lung le chai in an den piak colh. An nunnak zong a him ti lo, an nun chung an min a chia cang lai. An caah cun nunnak sungh bantuk khi a si cang. Mah pahnih hi ralkap thawng petu an si taktak ko ahcun thawl an ton zong ah velh an ton zong ah a poi ka ti bak lo, nain thawng a petu an si taktak lo ah teh, zeitin? timi ruah awk cu a si.
Salai Tluangte(The Hakha Post editor) cu February 2,2021 zong ah VP Van Thio kha Min Aung Hlaing kuttang ah Vice President a tuan than tiah thawng diklo a rak tialtu pa kha a si. Keimah pumpak zong aka rem lo ruang menmen ah ‘ralkap da-lan na si, thah nai huah te lai’ tiah HCJ page ah death threat aka tuahtu kha a si.
Sayama Sunghlei le Mih Nge kong a tialmi zong hi zumh thlu awk a tha hnga maw? Zeibantuk tet-te dah a ngeih hnga? Lunghrinh ruang menmen ah maw ‘da-lan an si’ tiah a fehter colh hnga? Mahti hramhram sual puhnak hi aho poah kan cung ah a tlung kho vemi a si.
Zeibantuk ka tial zong ah aho ka si timi an ka thei kho lai lo caah mi nunnak a liam zong ah a poi lo’ timi ruahnak tihnung hi doh a herh, tuahmi cung ah tuanvo lak ngamnak accountability a um a herh. Cu ruang ah page tlaitu min zarhkhat chung ka kherhhlai i zahan ah ka langhter ve kha a si. Salai Lungthli Tum. Credit : Time of Chin Herald.com
