Chin State Township Kip In 2008 Phunghram Apom I Election Alutmi Party Hna Nih CNF/A An Dirpi Ning Research:
Research ka langhter hlan ah Chin State ah thimnak a lutmi party min ka langhter hmasa lai. Chin State ah thimnak a lutmi party 7 an um. Cu hna cu; 1. USDP (Pimah Party), 2. NLD (Pimah Party), 3. CNLD (Miphun Party), 4. ZCD (Miphun Party), 5. CNP (Miphun Party), 6. ENDP (Miphun Party), 7. KNP (Miphun Party) hna an si. Hihi a tlangpi in USDP, NLD le Miphun Party tiah phunthum in then khawh an si.
Atu ka vun langhter ding hi Chin State Township kip i Party pathum supporter hna nih CNF/A an support ning a si lai. Research ka tuah ning bel hi kaupi in ka tuah kho lo. Pengkip i ka mitheih pahnih thum cio ka chawnhmi hna le pengkip i party cio nih an ngeihmi facebook page chung i mipi aw-an zoh in ka tuahmi a si. Chinram chaklei bik in ka vun thawk lai.
1. Tonzaang le Tedim; Hi khuapi pahnih ahhin party pali a um. USDP, NLD, CZD le CNLD an si.
ZCD le USDP nih CNF an pom lo. NLD a cheu le CNLD cheu nih CNF an pom ve. Hi peng pahnih ahcun ZCD hi an tambik caah a tlangpi in miphun party ( ZCD ) nih CNF an pomlo ti khawh a si. CNLD hmanh ah anpu ber Pu Zo Zam nih CNF zei ah a rel lem lo. Cucaah a tlangpi in NLD nih CNF an dirpi bik ti khawh a si hnga.
2. Falam; Falam cu a party in chim khawh a har ngai. Nain fiang ngai in hmuh khawh a simi cu ramdang um Falam mi CNLD pawl le Chin Party hruaitu pakhat Pu No Than Kap nih CNF an pomlo. An pomlo lawng si loin CNO/CNDF an dirh. Cucaah Falam miphun party pawl nih CNF an pomlo tiah a tlangpi in chim khawh a si. NLD tu cu a karlak ah an um. Nain CNF an soisel lem lo caah CNF he aa naihbik ti khawh an si.
3. Hakha le Thantlang; Hakha le Thantlang tu cu kan dihlak in
CNF/A kan dirpi dih ti khawh a si. NLD cheukhat bel te hi nai hrawng ceo in an lung a hun fiang ti khawh an si.
4. Matupi ; Matupi cu ngaihchia ngaingai an si. Matupi peng Miphun party a simi ENDP nih Mara hriamtlai an dirh. Cun Matupi peng CNLD le USDP nih CDM an tuah duh lo. An tuah lo lawng si loin CDM pawl an thihpheih hna. NLD cheukhat nih CDF an dirh i, NLD – MP nih PDF dirh an duh nain nihin tiang ahcun an dirh kho lo. Cucaah NLD party cheukhat ti dahlo a dang paoh cu chim awk an um lo. Cun Matupi peng CNLD cheukhat cu tu lio hi NLD doh in tan an lak lio a si caah CDM a lutmi NLD pawl an report lio cuahmah hna a si. Matupi ah CDF le CNF an thawn khawhlonak a ruang cu CNLD le USDP fawnh in dalaan a tuanmi an tamtuk caah a si.
5. Mindat le Kanpalet ; Hi penghnih hi cu zei party ti um loin an lung aa rual lio a si. Duh an nung ngai. A tlangpi in CNF/A an dirpi dih ko ti khawh a si. Cu belte CNA ralkap pakhat nih CDF cheukhat kha a chuahpi hna i CFA a dirhpi hna an ti.
6. Paletwa; Paletwa ah KNP le NLD nih CNF an dirpi i CNLD cheukhat zong nih an dirpi ve. CNLD hruaitu Pu Kyaw Neing bel ralhrang sin ah aa fonh. A tlangpi in Pu Soe Htet hruaimi NLD nih CNF an dirpi bik.
A cunglei number 1 in 6 tiang kan zoh tikah a tlangpi in NLD nih CNF/ A an dirpi bik ti khawh a si. Cun Hakha Thantlang chimlo pengdang ahhin cheuthum cheukhat tal nih cun CNF an dirpimi hmuh khawh a si. Cucaah CNF/A cu Chinmi kan ngeihmi ramkhel bu lakah Chinmi a kan huap bik ti cu al-awk um loin a fiang mi a si. CNF/CNA thawngchin lengmang ko seh.
(A cunglei ca hi Salai Tluang Tin Thang nih 8th July 2021 ah a facebook cahmai ah a tialmi kha van lak chinmi a si.)
