Special Advisory Council for Myanmar (SAC-M) in Yanghee Lee nih cun “Ralhrang SAC nih hin covid hi hriamnam pakhat bantukin an hman. Hihi ramkhel ah hmunhma a ngeih khawhnak ding le democracy cawlcanghnak hrawhnak dingah a si. Ramkip nih cohlanmi si khawhnak dingah hi bantuk harnak hi caantha ah la in ramkip he riantuantinak lam a kawl. Ralhrang bawi rual hi bawmhnak peknak rian tuanti hawi ah hman tlak an si lo, mithat lainawng an si i an sualnak ruangah tazacuai dingmi an si” tiah a chim.
SAC-M nih cun atu lioah Myanmar mipi nih an ton cuahmahmi covid zawtnak kongah ramkip nih a rannak in bawmh an herh tuk tiah cathanh a chuah. NUG, CDM, zatlangbu hna le democracy cawlcanghnak bu hna nih mipi bawmhnak rian an tuan cuahmah, mah hna cu dirkamh le bawmh cio dingin nawlnak cathanh a chuah.
“Feb 1 i nawlngeihnak a latu ralhrang phu nih mipi lakah covid zawtnak a karh khawhnak dingah lam an onh. SAC nih atu tiang cozah tlungtlang an dirh kho lo i rian zong an tuan kho fawn lo. Cucaah cun covid bawmhnak kongah cun democracy cawlcanghnak bu hna he kan tuanti lai” tiah SAC-M in Chris Sidoti nih a chim.
Covid bawmhnak cu Kachin, Karen, Karenni le Chin ramkulh hna ah a bik in a herh khun tiah theih a si. Ralhrang nih hramhram in mitlaih, mithahnak an tuah lengmang cash siibawi le ngandamnak riantuantu tampi hna cu an rian chuahtak in ramri an i dor. Cuticun harsa ngai in siikhan an tuah i rian an tuan cuahmah.
“ASEAN nih mipi bawmhnak pek dingin hnatlaknak an tuah cang. Myanmar mipi tampi an nunnak a liam cuahmah lioah ralhrang SAC duhning hoih in an ummi cu cohlan khawh a si lo. ASEAN le UN le zeidang bu si hna seh atu bantuk dirhmun ah khulfumh awk a tha lo. Myanmar mipi hna sinah direct in bawmhnak pek khawhnak lam a um cang” tiah SAC-M in Marzuki Darusman nih cun a chim ve.
Ralhrang SAC nih cun siibawi le ngandamnak riantuantu hna cu tlaihkhihnak, thahnawnnak, hrocernak an tuah peng, mizaw phawrtu mawtaw, siikhan le volunteer riantuantu hna zong an tlaih hna, harnak an pek hna, atu lebang cu siizung le sii lei thilri hna cu ralhrang SAC nih an lak viar i oxygen sehzung hna cu an khar dih cang tiah SAC-M cathanh ah cun an langhter. Crd: TCP
