Biak a si lo, Upat Hmaizahnak langhternak a si. Ai dawh tukmi Essther thil tuah kongah Laimi nan rak buai ngai hoi. Nan hmuhning a kauh deuh cun Buai awk khi a um lo. Nu caan pa caan a simi hna kha Upat peknak le hmaizahnak langhternak ah a biakmi a si. A ngaingai ti cun hihi Esther nih a biak ti nakin Esther nih Hla a chimtu kha kun bu in a upat a hmaizahnak a langhter ti cun a dik deuh ding si.
Aho nih dah Esther thil tuah hi biak a ti khawh lai? Pathian biak bantukin a biak ti ah ruah piak ding a si lo. Amah zong nih ka biak a ti fawn lai lo. Kawl a si caah anmah Kawl pawl nih an hmanmi Upat hmaizah anghternak phunkhat a simi in ka Ka upat, ka hmaizahnak ka langhternak a si ti tuin a ti lai. Esther nih hin Pathian biak bantukin a biakmi a si lo. Laimi Khrihfa Buai len awk a um lo.
Hi bantuk kun buin upat pek hi Laimi Khrihfa hmanh nih i cawn awk a ṭha i ai dawhmi nunphung pakhat a si. Laimi Pastor cheukaht hmanh nih hi bantuk hi ai dawh, i cawn awk a ṭha tiah an rak chim rel theo.
Bible biakamhlun minung te hna zong siangpahrang hna hmai ah an kun i upat hmaizah langhternak ah an biak hna. Jocob zong a salpa nih ka bawipa tiah a biak theo. Isak zong a nupi le a sal le nih upat peknak ah kun bu in an biak theo ve.
Jocob le Isak zong an pu le hmai ah kun in upat hmaizah pek langhternak ah an kun i an biak thiam ve hna. Upat tlakmi upat hmaizah peknak ah kun in biak cu Hlan khrihfa Bible minung hna hmanh nih an rak hman tukmi a si. Bible a relmi nih cun nan theih fian awk a si. Esther thil tuah kongah Soisel awk le mawhchiat awk pakhat hmanh a um lo.
Kawi pawl hmai i va kun paoh khi an biaknak vai i hrawm a si naisai lo. Midang Upat hmaizah peknak langhternak sawh khi a si ko. Hi ruang hna ah Esther nan soisel nan mawhchiat len cun nanmah nan sual deuh cang. Nan hmuhning a bit deuh bia zong a si. Nan hmuhning rak kauhter deuh cang u. Khrihfa biaknak kawm chung lawngah nan hmuhning le ruahnak i khumh peng ti hlah seh.
Nan ruahnak varal zong petter deuh pah cang ko u. Nai teah kan farnu Lamkam an phum mi kongah Chinmi nungphung theih i zuam u, Chinmi kan nunphung kan upat piak u, tiah nan au len bantukin Kawl pawl nunphung zong theih le hngalh i tim deuh ve u. Kawl nunphung upat piak zia zong thiam pah ve cang u sih.Catialtu: Bawi Khengmual
