Yangon ah Oxygen dur cawk a ngah ti lo ruangah Kalaymyo ah Oxygen an dih thluahmah tiah Covid-19 mizaw zohkhenhtu hna nih an chim. “Mizaw caah hmanding Oxygen hi nizan zongah a dih, nihin zong cu thiamthiam a si. Yangon ah oxygen company hna sinin cawk a ngah ti lo caah a si. Oxygen kan cawk tawnnak cu Yangon le Mandalay in a si bik.
Kan rak cawkka ah cun a man dengte hmanhseh atu cu cawk hrimhrim an phih khan asi ko cang. Thla khat hngak, ni 15 hngang ta ti lawngte a si ko cang” tiah mizaw zohkhenhtu chungtel pakhat nih a chim.
Coronavirus i chawn le zawtnak kaimi an tam biknak hmun pakhat simi Kalaymyo hi ramchung le ramleng in bawmchantu thil hlutu an um caah, cu an hlutmi in mizaw ihkhun siseh, cun Oxygen dur 200 in 400 hrawng nifatin a rak lut ko nain i zat asi lo ruangah atu bantuk in oxygen lei chambau le harsatnak an ton cu a si.
Sagaing division pengkulh chungah covid-19 mizaw hi nikhat hnu nikhat in an karh chin lengmang ko. Nihin July ni 6 nikhat chung lawngah covid 19 mizaw le lunghrinhmi a tlawm bik minung 27 an thi than tiah an chim. May thla in aa thawkmi Avoi Thumnak Covid-19 pulrai in hin Kalaymyo bak lawngah minung 500 hrawng a thimi an tlingmanh cang tiah a hmun ummi pakhat nih a chim.
Kalaymyo ah Oxygen lei he pehtlai in i zat lo le harsatnak a ngeimi mizaw, bawmh duhmi nih Covid Zawmi Zohkhentu (ကိုဗစ်လူနာများအား ကျန်းမာရေးစောင့်ရှောက်မှု – Healthcare for Covid Patient) KP Diary phone number 09457070084 or 09792778037 asi lai, cun မေတ္တာထွဋ်ခေါင် mi zohkhentu an phone number 09-449146619 ah chawnhbiak khawh an si. Ref. Mizzima
