CNA ralkap Runno/ဒုတပ်ကြပ် Salai Thang Hloh (kum 21) cu atulio Myanmar ramchung ralram hmun khat ah April 11 ah a nunnak a liam, tiah kan theih.
April 11 ah Myanmar ralkap nih ruah lo piin (Ambush) an kah hna i Salai Thang Hloh cu a lu ah meithal kuan nih a khen caah a nunnak a liam.
Salai Thang Hloh hi Dai (Chin) miphun a si i, nihin April 16 ah a ruakvuinak zong tlamtling tein an tuah, tiah thawng kan theih.
Relchap-Caankarlak Myanmar Cozah (NUG) nih Ralkap Bu Thar Dirh a Timh. Tlangcungmi hriamtlai hna he ceihmainak ngeih lio a si ko nain Myanmar mipi runvennak ca ah ralkap bu dirh ding in timhtuahnak kan ngei, tiah caankarlak Myanmar cozah “National Unity Government” (NUG) nih nihin April 16 ah an tuahmi Press Conference ah an langhter.
NUG runvennak vuanci U Yi Mon nih, “Mipi runvengtu ralkap bu ah Federal Democracy a dirpitu mino pawl an i tel lai. Tlangcungmi hriamtlai hna he ttang tti in mipi runvennak an tuah lai. Federal Army timi ralkap bu a chuah hlah ah Federal Alliance timi bu zong a chuak hmasa kho,” tiah a chim.
“Federal Army dirh kho ding in ramkhel lei hnatlak kong pawl tlangcungmi hriamtlai hna he kan i ceih lio a si. Atu kan ser dingmi mipi runvengtu ralkap bu zong hi Federal Army tang ah a um dingmi ralkap bu pakhat a si ko,” tiah a chim chap.
Nihin April 16 ah CRPH nih caan karlak Myanmar cozah (NUG) an dirhnak kong thawng an thanh hnu suimilam tlawmpal ah Press Conference an tuah colh i, mipi runvengtu ralkap bu dirhnak kong zong U Yi Mon nih a hun langhter hi a si.
Nihin ah caan karlak Myanmar cozah thar tlamtling tein an dirh khawh caah Yangon ah cun zaan sml. 7:30 hnu ah mizapi nih minute 3 chung zapei benghnak an ngei hna.
The Chin Journal
