Chan Ham Nu Thlacam Mi Bia, Ka Philh Kho Lo

Tutan ah teinak a kan hmuhpiaktu Pu Chan Ham Nu hi a nun lio ah Thla a cam tukmi nu a si. Kai theih hnu paohpaoh hi thlacam lawngte in a caan hi chun nitlak a hman ti tluk si. Chan Ham nu nih hin ramtang i thlacam a kal ahhin keimah ka hringtu ka nu hi thlacam ah ai hruai/kalpi tawn. Cu ahcun ka nu kha ka rak dawi tawn i, ka rak zulh tawn hna.

Ramtang (kan khua thlanmual) lei ahkhin an kal tawn i, Khupbil in mitthli he, ka nu he cun thla an rak cam tawn. Cu lio ah ka Pi, (Chan Ham nu) nih thla a rak cam tawnmi cu tlangkhatte lawng a si. Zeidang a chim ve lo, cu bia tlangkhat lawng cu a rak nolh peng. Cu bia tlangkhatte nihcun a mitthli a rak tlakter thluahmah tawn i, ka nu thlacam chung vialte a rak nolh peng. Chun nitlak in thla a rak cam tawnmi zong cu, cu bia tlangkhatte lawng cu a rak si peng.

Cucaah, mi nih na Pi thlacam nawl van cawng hnik an rak ka ti paoh ah ka rak cawn peng. Ka rak icinkentuk, a nawlcawn ka rak thiamtuk, a rak ka titu zong cu an nih a rak chuaktuk, an ka dai paoh ah an rak chimmi bia a si ve i ka rak cawn nolh ve peng. Kha lio ah kei nihcun ka Pi thlacam mi, Pathian sin ah a rak halmi kha, a sullam ka rak hngal lo. Cawng an ka ti paoh ah ka rak cawn sawh. Kha lio ka pi thlacam nawlcawng tiah a rak ka fialtu kha an rak ifiang ve hnga dek maw? Ka rak cawn ahhin an nih a rak chuak tuk!

Cu ka pi thlacam mi (Pathian sin a rak halmi) cu, ka upat deuh hnu ah ka nu le ka pa ka rak hal hna i an rak ka hrilhfiah. Nihin, ka hung upat deuh hnu, ka Pi thlacam ka ruah chel paoh ka thinlung a ka suk zungzal. Nihin ka nunnak cawmtu pakhat zong ah a cang beh ve. Cu ka pi (Chan Ham nu) thlacammi cu zeidah a si tiah cun “Bawipa Ka Thlacamnak Hi Amen Ti Awk A Za Cang Lo Maw? ” ti hi a rak si. Cu bia tlangkhat lawng cu, kai theih hnu a thlacam paohpaoh ah a rak nolh zungzal bia mi a si.

Zeiruang ah dah ka pi nihkhan kha bia tlangkhatte lawng (Bawipa Ka Thlacamnak Hi Amen Ti Awk A Za Cang Lo Maw? ) kha mitthli tla thluahmah in a rak nolh peng hnga tiah cun, Pathian sin ah thla hi a rak camtuk! A rak haltuk, sautuk chung a rak hal cang! Cu tikah ai ruahmi cu Bawipa, kan halmi, na sin ah thla ka cammi hi Amen van ti i, van leh ve awk ah a za cang lo maw? ti kha a rak chim duhmi a si.

Kan haltuk cang, na sin ah kan halnak caan hi a sau ve ko cang dawkaw, rak leh ve i thluachuahnak van ka pek ve awk a za cang ko lo maw? ti kha a chim duhmi a rak si. Cu tluk in thla hi a fale caah mitthli tla in a rak cam i, Pathian sinah a rak hal ve caah hawitluk si hna hlah hmanh seh, anmah le tawk in an fale nih thluachuah an hmuhnak a si.

Nihin ah Chan Ham nih teinak a hmuhnak zong hi, a liamcia caan ah kum tampi chung a nu nih mitthli tla buin thla a rak campiak hna nak kha a theipar a hung chuakmi a si. Nihin ah ka pi nih van in a van theih ve lai i, a rak i lawmtuk ve theo lai. Ka pi, na thlacam mi le na Pathian sin ah na rak halmi bia cu nihin ni tiang ka philh lo. Nihin ka nun a cawmtu pakhat ah a cang ve! Credit: K Chan

Total Page Visits: 284 - Today Page Visits: 1

Leave a Reply

Your email address will not be published. Required fields are marked *