National Unity Government thar ah kan Chin miphun chungin nanmah pa (2) nih cabinet rian lian pi nan liang cungah an in khinh hna tikah kan in lawmh pi hna.
Ka ngakchia lio tein kawl ralkap an tuah sernak a that lo zia ka theih peng.Hi ruangah ka nu le pa nih Mizoram ah khua a kan sak pi.
Ka nu nih India ram ah a kan liam tak i ka pa zong a tar cang. Na tuh mi na zun lai timi Baibal a zummi kan si. Ziah kawl ralkap hi an tuh mi atutiang an zun hnga lo?
An tuh mi zun ter dingah rian khinh nan si cang hi mu. Mipi ruah channak cu nan cungah aa fut cang hi mu. Nan raltha ko seh! Ralthat hi chawnh khawhmi zawtnak bantuk a si.
Nan ral that cun hruaimi zong kan ral tha ve lai. Pathian zong nih mi ralchia cu a hmang hna lo khah! Nan miphun hawi nih nan hnu lei he nan siar lei he kan in dir pi peng ko hna. Kan tei lai!
Caankarlak Myanmar Cozah (NUG) nih Ralkap Bu Thar Dirh a Timh. Tlangcungmi hriamtlai hna he ceihmainak ngeih lio a si ko nain Myanmar mipi runvennak ca ah ralkap bu dirh ding in timhtuahnak kan ngei, tiah caankarlak Myanmar cozah “National Unity Government” (NUG) nih nihin April 16 ah an tuahmi Press Conference ah an langhter.
NUG runvennak vuanci U Yi Mon nih, “Mipi runvengtu ralkap bu ah Federal Democracy a dirpitu mino pawl an i tel lai. Tlangcungmi hriamtlai hna he ttang tti in mipi runvennak an tuah lai. Federal Army timi ralkap bu a chuah hlah ah Federal Alliance timi bu zong a chuak hmasa kho,” tiah a chim.
“Federal Army dirh kho ding in ramkhel lei hnatlak kong pawl tlangcungmi hriamtlai hna he kan i ceih lio a si. Atu kan ser dingmi mipi runvengtu ralkap bu zong hi Federal Army tang ah a um dingmi ralkap bu pakhat a si ko,” tiah a chim chap.
Nihin April 16 ah CRPH nih caan karlak Myanmar cozah (NUG) an dirhnak kong thawng an thanh hnu suimilam tlawmpal ah Press Conference an tuah colh i, mipi runvengtu ralkap bu dirhnak kong zong U Yi Mon nih a hun langhter hi a si.
Nihin ah caan karlak Myanmar cozah thar tlamtling tein an dirh khawh caah Yangon ah cun zaan sml. 7:30 hnu ah mizapi nih minute 3 chung zapei benghnak an ngei hna.
The Chin Journal
