Kan Lai hlasak thiam Benjamin Sum nih dawh taktak le thiam taktak in Sungbung Airport hla thar akan sak piak mi cu lung a hmui kho taktak. A sa tu zong a thiam, a phuah tu zawng a thiam fawn, cun music tum tu hrimhrim a thiam tuk fawn.
Benjamin Sum nih Surbung Airport hla thar a sak mi hi Salai Kiling Maung nih a phuah mi a si. Mah hla te hi Chin ramkulh Sipin Vuanci U Soe Htet tawlrel pinak in an phuah mi hla a si.
Surbung Vanlawngbual ah a voi khatnak ART 72 vanlawng a tum cang. 2020 October 27 (10:30 AM), Falam Surbung Valawngbual ah ART 72 vanlawng phun a voi khatnak a tum cang.
Pupa chan ah zanttim arkhuang i a thawng te lawng an theih taawnmi vanlawng cu, atu kan chan te ah Lairam tlangpar ah a ttum ve cang. Chin ram nih tuanbia thar a ttial.
Tutan vanlawng a rak tum hi Vice President Pu Henry Van Thio Chinram a um lio theng ah rak tumter mi a si. Tutan a rak tum mi vanlawng hi ART 72 ti a si i minung 70 a phur kho mi a si. Hi bantuk vanlawng hi Myanmar ram nih10 kan ngei, an ti.
Vanlawngmawng (Pilot) minung 9 le Vanlawngcong ngaknu (Layzin-may) 3 nih an hun zulh hna. Kan chunmang le kan zaanmang cu tlam a tling cang. Kan i lawm ngaingai,” tiah Chin Ramkulh Cozah Lamsuul le Pehtlaihnak Minister Pu Sui Thio nih The Hakha Times ah a chim.
Surbung Vanlawngbual cu 2015-2016 kum in tuah hramthok mi a si i budget 35 billion dih in pe 6000’ sau, pe 100’ kau in sak mi a si. Rili in pe 6000’ a sannak hmun ah tuah mi a si i Myanmar ram Vanlawngbual lak ah 69nak vanlawngbual a si, tiah kan theih.
